ab kaar_gaah-e-dahar me.n lagataa hai bahut dil
ai dost kahii.n ye bhii teraa Gam to nahii.n hai

dekh zindaa.N se pare rang-e-chaman josh-e-bahaar
raqs karanaa hai to phir paao.n kii zanjiir na dekh

duaa detii hai.n raahe.n aaj bhii mujh aablaa_paa ko
mere qadamo.n kii gul_kaarii bayaabaa.N se chaman tak hai

Gam-e-hayaat ne aavaaraa kar diyaa varnaa
thii aarazuu ke tere dar pe subah-o-shaam kare.n

jalaa ke mashaal-e-jaa.N ham junuu.N sifaat chale
jo ghar ko aag lagaaye hamare saath chale
 
sutuun-e-daar pe rakhate chalo saro.n ke charaaG
jahaa.N talak ye sitam kii siyaah raat chale

Contributed by Ahmed Safi
 
kahaa.N sahan-e-chaman me.n baat kuu-e-sarfaroshaa.N kii
idhar se saadaa-ruu pahu.Nche udhar se laalaa rang aaye

mai.n akelaa hii chalaa thaa jaanib-e-manzil magar
log saath aate gaye aur kaaravaa.N banataa gayaa
 
jis taraf bhii chal pa.De ham aabalaa paayaan-e-shauq
Khaar se gul aur gul se gul_sitaa.N banataa gayaa

Contributed by Ahmed Safi
 
'Majrooh' sune kaun merii talKh-kalaamii
guftaar-e-aziizaa.N shakar-aamez bahot hai

rok sakataa hame.n zindaa.N-e-balaa kyaa majaruuh
ham to aavaaz hai.n diivaar se chhan jaate hai.n

Contributed by Fayaz Razvi
 
sang ko_ii ba.Dh ke uThaao shaaKh-e-samar kuchh duur nahii.n
jis ko balandii samajhe ho in haatho.n kii kotaahii hai

shab-e-intazaar kii kash-ma-kash na puuch kaise sahar hu_ii
kabhii ik chiraaG jalaa diyaa kabhii ik chiraaG bujhaa diyaa

shab-e-zulm narGaa-e-raahazan se pukaarataa hai ko_ii mujhe
mai.n faraaz-e-daar se dekh luu.N kahii.n kaaravaan-e-sahar na ho
 
mai.n hazaar shakl badal chukaa chaman-e-jahaa.N me.n sun ai sabaa
ke jo phuul hai tere haath me.n ye meraa hii laKht-e-jigar na ho

taqadiir kaa shikavaa be-maanii jiinaa hii tujhe manzuur nahii.n
aap apanaa muqaddar ban na sake itanaa to ko_ii majabuur nahii.n

ye shauq-e-kaamayaab ye tum ye fizaa ye raat
kah do to aaj rok duu.N ba.Dhakar sahar ko mai.n

zabaa.N hamaarii na samajhaa yahaa.N ko_ii majaruuh
ham ajanabii kii tarah apane hii vatan me.n rahe